દક્ષિણ ધ્રુવ (South Pole)ને પૃથ્વીની સૌથી ઠંડી જગ્યા માનવામાં આવે છે, પરંતુ ગ્લોબલ વૉર્મિંગની ગંભીર અસર સાઉથ પોલ પર પણ જોવા મળી રહી છે.
એક અભ્યાસ અનુસાર, દક્ષિણ ધ્રુવનું તાપમાન ઝડપથી વધી રહ્યું છે.
પહેલા વૈજ્ઞાનિકોનું માનવું હતું કે દક્ષિણ ધ્રુવ પોતાના ઠંડા તાપમાનને કારણે ગરમ થતા નથી, પરંતુ એક નવા અભ્યાસથી જાણવા મળ્યું છે કે વર્ષ 1989 અને 2018 દરમિયાન દક્ષિણ ધ્રુવ છેલ્લા 30 વર્ષોમાં +0.6 ડિગ્રી સેલ્સિયસ પ્રતિ દશકના રેટથી 1.8 ડિગ્રી સેલ્સિયસ જેટલો ગરમ થયો છે જે વૈશ્વિક સરેરાશ કરતા ત્રણ ગણુ વધારે છે.
છેલ્લા 60 વર્ષોના હવામાનના આંકડાઓનું વિશ્લેષણ કરતા અમેરિકા, ન્યૂઝિલેન્ડ અને બ્રિટનના સંશોધનકર્તાઓને જાણવા મળ્યું છે કે દક્ષિણ ધ્રુવ ઝડપથી ગરમ થઇ રહ્યો છે.
એન્ટાર્કટિકાના 20 હવામાન સ્ટેશનોના આંકડા પર ધ્યાન કેન્દ્રિત કરતા જાણવા મળ્યું છે કે દક્ષિણ ધ્રુવના વધતા તાપમાનનો દર સમગ્ર ખંડના સરેરાશથી સાત ગણો વધારે હતો. રિસર્ચથી જાણવા મળ્યુ છે કે આ વિસ્તાર વર્ષ 1989થી 1.83 ડિગ્રી સેલ્સિયસથી વધારે ગરમ થયો છે, જેનાથી પ્રકૃતિ નિષ્ણાંતો ચિંતામાં મુકાઇ ગયા છે.
અભ્યાસમાં જાણવા મળ્યું છે કે સમુદ્રના ગરમ તાપમાને દાયકાઓથી દક્ષિણ એટલાન્ટિકમાં વેડેલ સમુદ્ર પર વાતાવરણીય દબાણ ઘટાડી દીધું હતું. જેનાથી દક્ષિણ ધ્રુવ પર ગરમ હવાના પ્રવાહનો વેગ વધી ગયો હતો.
સંશોધનકર્તાઓ અનુસાર, દક્ષિણ ધ્રુવ પર ક્લાઇમેટ ચેન્જને ઇન્ટરડેકેડલ પેસિફિક ઓસિલેશન (IPO)ના રૂપે ઓળખવામાં આવે છે. આ ચક્ર સકારાત્મક અને નકારાત્મક અવસ્થા વચ્ચે લગભગ 15-30 વર્ષો સુધી રહે છે.
અભ્યાસમાં કહેવામાં આવ્યું છે કે, ‘આ પરિણામ આંતરિક એન્ટાર્કટિકના હવામાનને ઉષ્ણકટિબંધીય પરિવર્તનશીલતા સાથે જોડે છે.
આ અભ્યાસથી જાણવા મળ્યું છે કે, વાતાવરણની આંતરિક પરિવર્તનશીલતા એન્ટાર્કટિકાના આંતરિક વિસ્તારમાં ક્લાઇમેટ ચેન્જ લાવી શકે છે, જેણે ત્યાં એકવીસમી સદી દરમિયાન માનવસર્જિત વૉર્મિંગના સંકેત આપ્યા છે.’